السلام عليكم ورحمة الله تعالى و بركاته
حكايتي فيها مرحلتين :
المرحلة الأولى: كي كانت البطولة تاعنا نيفو طالع
نشفا كي كنت صغير كنت نتبع من قلبي البطولة تاعنا حيث كنت داير في بالي نيفو تاعها طالع
نكتب النتائج .الأرقام.الأهداف . كلش يخص البطولة في الكراس تاعي
كنت نشوف جميع المقابلات كاين فيها فريقي و لا ماكاش كيف كيف عندي
كنت نشوف 90 دقيقة و أنا في بالي راني نشوف بالون تاع الصح
كنت نطلع لسطاد نعيي روحي نرمي دراهمي زيد كي نلحق لدار يستناني لكرافاش
اومباعد باش فهمت بلي ماكاين والو
المرحلة الثانية : كي رجعت البطولة كارطون و المال هو اللي يحكم
بديت نتحلب كيما يقولو.. ...وليت نشوف رابطة أبطال أوربا في اليتيمة شفت بلي البالون تاعهم ايدور خير من البالون تاعنا
قلت بالاك البالون تاعنا مكابوسي ما أمنتش و بقيت مذهول مع مرور الوقت وليت نلقى متعة كبيرة في مشاهدة
السهرة الأوربية مع حفيظ دراجي يمات أجاكس أمستردام و بوروسيا و مانشستر يونايتد و جاو اليامات تاع ريفالدو و لي كوتسيزو
ولكنني بقيت شايد في البطولة تاعنا و نشوف فيها وشنو ماشي 90 دقيقة كيما كنت
جا النيميريك ربحت......وليت نشوف البطولات الأوربية: الانجليزية. الايطالية. الاسبانية .الهولندية.البرتغالية
الفن و العفن مافهمت والو بديت نفيق لروحي بل كانو يجوزو بينا الوقت
تما بديت نكره البطولة تاعنا وليت نشوفها كارطون تع الصح خاصة بعدما ولاو الرؤساء تاع الفرق ابيعو ويشريو
ولكن رغم ذلك بقيت نتبعها وفي راسي حلم هو نشوف لكيب ناسيونال في المونديال أومبعد ننعل الشيطان ونضحك على روحي
لحقنا ل 2010 تأهلنا للمونديال بالمحترفين فرحنا و زهينا و عرفنا بلي لوكان المحليين اللي لعبو..... كوب دفريك مانشوفوهاش
جات كوب دافريك لعبو لحقو لنصف النهائي ...الحكاية تعرفوها ........لعبنا المركز الثالث بالمحليين و شوية محترفين
المحليين ما قدمو والو .....هادا رايي
بديت نحس بلي ظلمت الكارطون كي شبهت البطولة تاعنا بيه ....بديت نكره حتى الاسم تاعها
حتا كي بدلولها ولات دوري نجمة على وزن دوري أورونج تع فغانسا
.....................................................................
خرجت باستنتاج أنو لازم البطولة تاعنا تحبس على الأقل 5 سنوات تبدا من الصفر يبنو الملاعب تع الصح يفتحو مدارس كروية شعارها ماكاش المعريفة
و يتكلو على ربي .........
ودمتم في رعاية الله و حفظه
